ભારતે ટોસ જીતીને પહેલા બેટિંગ લીધી હતી. રોહિત શર્માએ 39 દડામાં 53 રન, કોહલીએ 44 દડામાં અણનમ 62 રન અને સૂર્યાકુમારે 25 દડામાં અણનમ 51 રન ફટકાર્યા હતા. જોકે, રોહિત સાથે ઓપનિંગમાં ઉતરેલો કેએલ રાહુલ ફરી એકવખત નિષ્ફળ રહ્યો હતો. તે માત્ર 9 રન બનાવી એલબીડબલ્યુ આઉટ થઈ ગયો હતો. ભારતે પોતાની ઈનિંગ્સની 20 ઓવરમાં બે વિકેટે 179 રન બનાવ્યા હતા અને એ રીતે નેધરલેન્ડને જીત માટે 180 રનનો ટાર્ગેટ મળ્યો હતો.
ધીમી પીચ પર વિશાળ સ્કોરનો પીછો કરવા ઉતરેલી નેધરલેન્ડની ટીમની શરૂઆત ખરાબ રહી હતી. તેને ત્રણ ઓવરમાં 11 રન પર વિક્રમજીત સિંહ (1 રન)ના રૂપમાં ઝટકો લાગ્યો. વિક્રમજીતને ભુવનેશ્વરકુમારે ક્લીન બોલ્ડ કર્યો, તે પછી મેક્સ ડીડોડ (16 રન)એ અક્ષર પટેલનો શિકાર બન્યો. તે પણ ક્લીન બોલ્ડ થયો. તે પછી ડી લીડેને પણ અક્ષર પટેલે 16 રને પેવેલિયન ભેગો કરી દીધો. નેધરલેન્ડ માટે લક્ષ્ય મુશ્કેલ બનતું જતું હતું, ત્યારે 13મી ઓવર નાખવા આવેલા રવિચંદ્રન અશ્વિને એક જ ઓવરમાં બે વિકેટ ઝડપી તેની બેટિંગ લાઈનની કમર તોડી નાખી. તેમે પહેલા કોલિન એકરમેને 17 રને અને ટોપ કૂપરને 9 રને આઉટ કર્યો. તો ભુવનેશ્વર કુમારે સ્કોટ એડવર્ડસ (5 રન) અને મોહમ્મદ શમીએ ટિમ પ્રિંગલ (20 રન) અને અર્શદીપે લોગન વેન બીક (3 રન) અને ફ્રેડ ક્લાસેન (0 રન)ની વિકેટ ઝડપી હતી. આમ, નેધરલેન્ડની ટીમ નિર્ધારિત 20 ઓવરમાં 9 વિકેટના ભોગે માત્ર 123 રન જ બનાવી શકી હતી અને ભારતનો 56 રને વિજય થયો હતો.