india vs netherlands, T20 WC: નેધરલેન્ડ્સ વિરુદ્ધ જીત બાદ પણ ભારત સામે છે ત્રણ સમસ્યા, ઝડપથી ઉકેલવી પડશે – t20 world cup 2022 three weakness of team india despite victory against netherlands

ટી20 ક્રિકેટ વર્લ્ડ કપમાં ભારતીય ટીમે પોતાનું વિજય અભિયાન જારી રાખ્યું છે. રોહિત શર્માની આગેવાનીવાળી ટીમે સિડની ક્રિકેટ ગ્રાઉન્ડમાં રમાયેલી મેચમાં નેધરલેન્ડ્સ સામે 56 રને વિજય નોંધાવ્યો હતો. પ્રથમ બેટિંગ કરતા ભારતીય ટીમે 20 ઓવરમાં બે વિકેટે 179 રન નોંધાવ્યા હતા. રોહિત શર્માની સાથે સાથે વિરાટ કોહલી અને સૂર્યકુમાર યાદવે પણ અડધી સદી ફટકારી હતી. ભારતીય બેટર્સે દમદાર પ્રદર્શન કર્યા બાદ બોલર્સે પણ કમાલ કરી હતી. નેધરલેન્ડ્સની ટીમ 20 ઓવર રમી હતી પરંતુ 123 રન જ નોંધાવી શકી હતી. ટીમ ઈન્ડિયાનો આ સળંગ બીજો વિજય છે. અગાઉ ભારતે કટ્ટર હરીફ પાકિસ્તાન સામે વિજય નોંધાવ્યો હતો. નેધરલેન્ડ્સ સામે ભારતનો વિજય થયો હતો પરંતુ ભારતીય ટીમમાં હજી કેટલીક સમસ્યાઓ છે જેનો ઝડપથી ઉકેલ લાવવો જરૂરી છે.

ઓપનર લોકેશ રાહુલનું ફોર્મ
ઓપનર લોકેશ રાહુલ સળંગ બીજી મેચમાં ફ્લોપ રહ્યો હતો. સિડનીની બેટિંગ માટે આસાન પિચ પર તે અપેક્ષા પ્રમાણે બેટિંગ કરી શક્યો ન હતો. તે 12 બોલમાં 9 રન નોંધાવીને આઉટ થયો હતો. પ્રથમ મેચમાં પાકિસ્તાન સામે પણ તેણે નિરાશ કર્યા હતા. વર્લ્ડ કપ જેવી મહત્વની ટુર્નામેન્ટમાં ટીમ ઈન્ડિયાના ઓપનરનું ફોર્મ ટીમ માટે મોટી ચિંતાનો વિષય છે.

પાવરપ્લેમાં બેટિંગ
ભારતીય ટીમ સળંગ બીજી મેચમાં પાવરપ્લેમાં કમાલ કરી શકી નથી. ટીમે પાકિસ્તાન વિરુદ્ધ પ્રથમ છ ઓવરમાં 31 રન નોંધાવ્યા હતા. જ્યારે નેધરલેન્ડ્સ જેવી નબળી બોલિંગ લાઈનઅપ ધરાવતી ટીમ સામે પણ ટીમ પાવરપ્લેમાં 32 રન નોંધાવી શકી હતી. હવે રોહિત શર્માની ટીમનો સામનો સાઉથ આફ્રિકા સામે થવાનો છે, જેની પાસે વિશ્વનું સર્વશ્રેષ્ઠ બોલિંગ આક્રમણ છે. તેવામાં ટીમ ઈન્ડિયા માટે પાવરપ્લેની બેટિંગ ચિંતાનો વિષય છે.

દિનેશ કાર્તિકની વિકેટકીપિંગ
દિનેશ કાર્તિકે 18 વર્ષ અગાઉ ડેબ્યુ કર્યું હતું. ત્યારથી તેની વિકેટકીપિંગમાં મુશ્કેલી જોવા મળી રહી છે. પાકિસ્તાન વિરુદ્ધ મેચમાં અંતિમ બોલ પર ડાયરેક્ટ હિટ કરી શક્યો ન હતો અને તે બેટર્સ બે રન દોડી ગયા હતા. નેધરલેન્ડ્સને તેણે આસાન સ્ટમ્પિંગ છોડી દીધું હતું. મોટી ટીમો સામે અને મહત્વની મેચમાં નબળી વિકેટકીપિંગ ટીમને ભારે પડી શકે છે.