Women’s Asia Cup 2022 Final: ફાઈનલમાં ભારતે શ્રીલંકાને પરાજય આપ્યો. એશિયા કપની આ આઠમી સિઝન હતી અને તેમાં ભારત સાતમી વખત ચેમ્પિયન બન્યું છે. સ્મૃતિ મંધાના (Smriti Mandhana)એ આક્રમક બેટિંગ કરતા અડધી સદી ફટકારી હતી અને ટીમને વિજય અપાવવામાં મહત્વની ભૂમિકા ભજવી હતી. પ્લેયર ઓફ ધ મેચ રેણુકા સિંહે ત્રણ વિકેટ ઝડપી હતી
હાઈલાઈટ્સ:
- વિમેન્સ એશિયા કપ ટી20ની ફાઈનલમાં ભારતીય મહિલા ટીમે શ્રીલંકાને આઠ વિકેટે પરાજય આપ્યો
- ભારતીય ટીમ વિમેન્સ એશિયા કપની આઠમી સિઝનમાં સાતમી વખત ચેમ્પિયન બની
- પ્લેયર ઓફ ધ મેચ રેણુકા ઠાકુરની ત્રણ વિકેટ, ઓપનર સ્મૃતિ મંધાનાની અણનમ અડધી સદી
ભારતીય બોલર્સ સામે શ્રીલંકન ટીમ ધ્વસ્ત
ભારતીય ટીમે બેટિંગ, બોલિંગ અને ફિલ્ડિંગ ત્રણેયમાં લાજવાબ પ્રદર્શન કર્યું હતું. ભારતીય બોલર્સ સામે શ્રીલંકન બેટર્સ ટકી શકી ન હતી અને ટીમ નિર્ધારીત 20 ઓવરમાં નવ વિકેટે 65 રન જ નોંધાવી શકી હતી. ટીમને ત્રીજી જ ઓવરમાં પ્રથમ ઝાટકો લાગ્યો હતો. સુકાની ચમારી અટાપટ્ટુ 6 રન નોંધાવીને આઉટ થઈ ગઈ હતી. ચોથી ઓવરમાં શ્રીલંકાને ત્રણ બોલ પર ત્રણ ઝાટકા લાગ્યા હતા. રેણુકા સિંહને બે વિકેટ મળી હતી. જ્યારે એક બેટર રન આઉટ થઈ હતી. 43 રનના સ્કોર પર ટીમે નવ વિકેટ ગુમાવી દીધી હતી. જોકે, બાદમાં રાનાવીરા અને અચિતિએ 22 રનની અતૂટ ભાગીદારી નોંધાવી હતી. રાનાવીરાએ ટીમ માટે સૌથી વધુ 18 રન નોંધાવ્યા હતા. ભારત માટે પ્લેયર ઓફ ધ મેચ રહેલી રેણુકાએ સૌથી વધુ ત્રણ વિકેટ ઝડપી હતી. જ્યારે સ્નેહ રાણા અને રાજેશ્વરી ગાયકવાડને 2-2 સફળતા મળી હતી.
મંધાનાની અડધી સદી, ભારતે નવમી ઓવરમાં જ જીતી લીધી મેચ
66 રનના લક્ષ્યાંકને પાર પાડવામાં ભારતીય ટીમને વધારે મહેનત પડી ન હતી. ઓપનર સ્મૃતિ મંધાનાએ શરૂઆતથી જ આક્રમક વલણ અપનાવ્યું હતું. તેણે પ્રથમ વિકેટ માટે શેફાલી વર્મા (5 રન) સાથે 32 રનની ભાગીદારી નોંધાવી હતી. જેમિમા રોડ્રિગ્સ બે રન નોંધાવીને આઉટ થઈ હતી. જોકે, સામે છે ડે મંધાનાએ આક્રમક બેટિંગ યથાવત રાખી હતી. તેણે નવમી ઓવરમાં સિક્સર ફટકારીને ટીમને વિજય અપાવ્યો હતો. તેણે 25 બોલમાં છ ચોગ્ગા અને ત્રણ સિક્સરની મદદથી 51 રન નોંધાવ્યા હતા. સુકાની હરમનપ્રીત કૌર 11 રન નોંધાવીને અણનમ રહી હતી. ભારતને ગત એશિયા કપમાં બાંગ્લાદેશ વિરુદ્ધ પરાજયનો સામનો કરવો પડ્યો હતો. આ સિવાય ભારતીય ટીમ પ્રત્યેક વખતે ચેમ્પિયન રહી છે.
Gujarati News – I am Gujarat: ગુજરાત, દેશ, વિદેશ, શિક્ષણ, બિઝનેસ, મૂવી, જ્યોતિષ, ધર્મ, સ્પોર્ટ્સના લેટેસ્ટ સમાચાર ઉપરાંત વાયરલ ન્યૂઝ મેળવવા માટે ડાઉનલોડ કરો I am Gujaratની એપ