તેણે કહ્યું હતું કે, દરેકનો પોતાનો અભિપ્રાય છે. ભૂતપૂર્વ ખેલાડીઓને તેમના મંતવ્યો શેર કરવાનો સંપૂર્ણ અધિકાર છે પરંતુ મને નથી લાગતું કે આ ટીમમાં કોઈ પ્રકારનો ઘમંડ છે. સૌરાષ્ટ્રના સ્ટારે કહ્યું હતું કે, દરેક ખેલાડી તેની રમતનો આનંદ માણી રહ્યો છે અને દરેક ખેલાડી સખત મહેનત કરી રહ્યો છે. કોઈ પણ ખેલાડી કોઈ વાતને હળવાશથી લેતો નથી. તેઓ તેમનું 100 ટકા યોગદાન આપી રહ્યા છે. જ્યારે ભારતીય ટીમ મેચ હારે છે ત્યારે આવી પ્રતિક્રિયાઓ આવતી હોય છે.
તેણે કહ્યું હતું કે, વર્તમાન ટીમમાં સારા ખેલાડીઓ છે અને અમે ભારતનું પ્રતિનિધિત્વ કરી રહ્યા છીએ અને આ અમારો મુખ્ય ઉદ્દેશ્ય છે. કોઈની પાસે કોઈ અંગત એજન્ડા નથી. જાડેજાએ એમ પણ કહ્યું હતું કે વેસ્ટ ઈન્ડિઝ સામેની વનડે શ્રેણીમાં પ્રયોગ કરવા છતાં 30 ઓગસ્ટથી શરૂ થઈ રહેલા એશિયા કપ માટે પ્લેઈંગ ઈલેવન પહેલાથી જ નક્કી કરી લેવામાં આવી છે.
ભારતે બીજી વનડેમાં નિયમિત કેપ્ટન રોહિત શર્મા અને સ્ટાર બેટ્સમેન વિરાટ કોહલીને આરામ આપ્યો હતો. ભારત આ મેચ છ વિકેટે હારી ગયું હતું. તેણે પ્રથમ મેચ પાંચ વિકેટથી જીતી હતી. જાડેજાએ કહ્યું હતું કે, આ સિરીઝ એશિયા કપ અને વર્લ્ડ કપ પહેલા રમાઈ રહી છે જેમાં અમે પ્રયોગ કરી શકીએ છીએ. આમાં અમે નવા કોમ્બિનેશન અજમાવી શકીએ છીએ. આના પરથી આપણે ટીમના સંતુલન, મજબૂત અને નબળા પાસાઓ વિશે જાણીશું. તેણે કહ્યું હતું કે, કેપ્ટન અને ટીમ મેનેજમેન્ટ જાણે છે કે તેઓ કયા સંયોજન સાથે રમશે. આ અંગે કોઈ મૂંઝવણ નથી. અમે એશિયા કપ માટે સંયોજન નક્કી કરી લીધું છે. પરંતુ આ પ્રયોગ બેટિંગ ક્રમમાં ચોક્કસ સ્થાન પર ખેલાડીને અજમાવવા સાથે સંબંધિત છે.