એક સમયે પીઠની ઈજાએ હાર્દિક પંડ્યાની કારકિર્દી જોખમમાં મૂકી દીધી હતી. જોકે, વડોદરાનો આ ઓલ-રાઉન્ડર પણ હાર માન્યો નહીં. તે બોલિંગ કરી શકશે કે કેમ તેવા પણ સવાલો થયા હતા પરંતુ તે બધાથી ડગ્યા વગર હાર્દિકે આકરી મહેનત અને વર્ક આઉટ દ્વારા ફિટનેસ પ્રાપ્ત કરી ટીમ ઈન્ડિયામાં પાછો ફર્યો. બોલિંગ કે બેટિંગ હવે તે વધારે પરિપક્વ જોવા મળી રહ્યો છે.
હાઈલાઈટ્સ:
- પીઠની ઈજાના કારણે હાર્દિક પંડ્યાની કારકિર્દી જોખમમાં મૂકાઈ ગઈ હતી અને તે ટીમની બહાર થઈ ગયો હતો
- હાર્દિકે ફિટનેસ મેળવી અને ટીમ ઈન્ડિયામાં ધમાકેદાર પુમરાગમન કરતા પાકિસ્તાન સામે જીતનો હીરો રહ્યો
- હાર્દિક પંડ્યા હવે ધોનીની જેમ ધીરજ રાખીને બેટિંગ કરે છે અને મેદાનમાં પણ વધારે પરિપક્વ દેખાઈ રહ્યો છે
હાર્દિક નહીં પરંતુ હાર્દિક 2.0 કહો
હાર્દિક પંડ્યા માટે પુનરાગમનનો માર્ગ આસાન ન હતો. તેને બેવડી લડાઈ લડવી પડી હતી. એક તરફ પીઠની ઈજા તો બીજી તરફ આકરા સવાલો. શું હાર્દિક ક્યારે સંપૂર્ણ પણે ફિટ થઈને બોલિંગ કરી શકશે? જો એવું નહીં કરી શકે તો શું તે ફક્ત બેટર તરીકે ટીમમાં પોતાનું સ્થાન બનાવી શકશે? શું ટીમ બેલેન્સ પ્રમાણે તે યોગ્ય હશે? આ વર્ષે ફેબ્રુઆરીની શરૂઆત સુધી તો તેની ઈજા એક રહસ્ય બની રહી હતી. ખાસ કરીને તેની બોલિંગ. જોકે તેણે જાહેરમાં આ વાતની ચર્ચા ક્યારેય કરી ન હતી. નવી આઈપીએલ ફ્રેન્ચાઈઝી ગુજરાત ટાઈટન્સે જ્યારે તેને સુકાની બનાવીને પ્રેસ કોન્ફરન્સ કરી ત્યારે પણ તેણે પોતાની બોલિંગ અંગે કોઈ જવાબ આપ્યો ન હતો. ગત વર્ષે ટી20 વર્લ્ડ કપ બાદથી હાર્દિક સ્પેશિયાલિસ્ટ બેટર તરીકે રમવા લાગ્યો હતો. આ તે સમય હતો જ્યાં તેણે પોતાના પર કામ કરવાનું શરૂ કર્યું હતું. તે ફક્ત ઉંઘતો અને ટ્રેનિંગ કરતો. પોતાના માટે રોબોટ જેવું શિડ્યુલ તૈયાર કરી લીધું હતું.
મેન્ટર ધોનીની ઝલક કેમ દેખાય છે?
એમએસ ધોની હંમેશા એક પ્લાનિંગ સાથે રમતો હતો. તે મેચને અંત સુધી લઈ જવાનું પસંદ કરતો હતો. માહી જાણતો હતો કે ગેમ જેટલી લંબાશે બોલર તેટલા જ દબાણમાં આવી જશે. પછી ફક્ત એક જ ભૂલ વળતો પ્રહાર કરવા માટે પૂરતી હોય છે. હાર્દિક પંડ્યાએ પણ તેવું જ કર્યું હતું. જ્યારે ત્રણ બોલમાં છ રન જોઈતા હતા ત્યારે લોંગ ઓન પર એક ફ્લેટ સિક્સર ફટકારીને ટીમને વિજય અપાવ્યો હતો. પછી ના કોઈ ગુસ્સો, ના આક્રોશ કે ના કોઈ ઉત્સાહ ભરેલી ઉજવણી. બસ ચહેરા પર શાંતિ અને એક સ્મિત ભરેલો આત્મવિશ્વાસ જે જણાવી રહ્યો હતો કે હાર્દિકને ખબર હતી કે જીતવાનું નક્કી છે. ટી20માં સિક્સર ફટકારીને વિજય અપાવવાના મામલે હાર્દિક પંડ્યાએ પોતાના ભૂતપૂર્વ સુકાની મહેન્દ્ર સિંહ ધોનીની બરાબરી કરી લીધી.
Gujarati News – I am Gujarat: ગુજરાત, દેશ, વિદેશ, શિક્ષણ, બિઝનેસ, મૂવી, જ્યોતિષ, ધર્મ, સ્પોર્ટ્સના લેટેસ્ટ સમાચાર ઉપરાંત વાયરલ ન્યૂઝ મેળવવા માટે ડાઉનલોડ કરો I am Gujaratની એપ