બીજી ટેસ્ટમાં 80 અને 57 રનની ઈનિંગ્સ રમનારા રોહિત શર્માના 759 પોઈન્ટ છે અને તે શ્રીલંકાના કેપ્ટન દિમુથ કરુણારત્ને સાથે નવમા સ્થાને છે. રિશભ પંત એક સ્થાન નીચે 12મા અને વિરાટ કોહલી 14મા સ્થાને છે. ઓસ્ટ્રેલિયાનો માર્નસ લાબુશેન અને ઈંગ્લેન્ડના જો રૂટ અનુક્રમે બીજા અને ત્રીજા સ્થાને છે. ટેસ્ટ રેન્કિંગમાં ન્યૂઝીલેન્ડનો દિગ્ગજ કેન વિલિયમસન ટોપ પર છે. ઈંગ્લેન્ડનો જેક્સ ક્રાઉલી 13 સ્થાનના ફાયદા સાથે 35માં સ્થાને છે. જ્યારે હેરી બ્રુક 11મા અને જોની બેયરસ્ટો સંયુક્ત 19મા ક્રમે છે.
ભારતનો અનુભવી સ્પિનર રવિચંદ્રન અશ્વિન બોલરોની યાદીમાં ટોચ પર છે જ્યારે રવિન્દ્ર જાડેજા છઠ્ઠા સ્થાને છે. ફાસ્ટ બોલર મોહમ્મદ સિરાજ 33મા સ્થાને પહોંચી ગયો છે. શ્રીલંકાના પ્રભાત જયસૂર્યાએ કારકિર્દીનો સર્વશ્રેષ્ઠ ક્રમાંક હાંસલ કર્યો છે. પ્રભાત જયસૂર્યા રેન્કિંગમાં સાતમા સ્થાને પહોંચી ગયો છે. જયસૂર્યાનો સ્પિન પાર્ટનર રમેશ મેન્ડિસ એક સ્થાન આગળ વધીને 21મા સ્થાને છે. ઓલરાઉન્ડર્સ રેન્કિંગમાં ભારતીય ખેલાડીઓનો દબદબો રહ્યો છે. ઓલ-રાઉન્ડર રેન્કિંગમાં જાડેજા અને અશ્વિન ટોચના બે સ્થાન પર છે જ્યારે અક્ષર પટેલ પાંચમા સ્થાને છે. હાલમાં ભારતીય ટીમ વેસ્ટ ઈન્ડિઝના પ્રવાસે છે. ટીમે વેસ્ટ ઈન્ડિઝમાં બે મેચની સીરિઝ 1-0થી જીતી લીધી છે. પ્રથમ ટેસ્ટમાં ભારતનો વિજય થયો હતો જ્યારે બીજી મેચ વરસાદના કારણે ડ્રો રહી હતી. હવે બંને ટીમો વચ્ચે વન-ડે અને ટી20 મેચની સીરિઝ રમાશે.