હા, અમે અહીં પૃથ્વી શો વિશે વાત કરી રહ્યા છીએ. પૃથ્વી શોએ એક ઈન્ટરવ્યુમાં કહ્યું હતું કે તે એકલો રહેવા લાગ્યો છે. તેણે કહ્યું કે જ્યારે પણ તે બહાર નીકળે છે ત્યારે લોકો તેને હેરાન કરે છે અને મુશ્કેલી ઊભી થાય છે. તેણે એમ પણ કહ્યું છે કે જ્યારે તેને ભારતીય ટીમમાંથી બહાર કરવામાં આવ્યો ત્યારે તે નિરાશ થયો હતો પરંતુ તેણે આગળ વધવાનું નક્કી કર્યું. પૃથ્વી શોનું ટોચ પર પહોંચવું સરળ હતું.
તેણે કેપ્ટન તરીકે અંડર-19 વર્લ્ડ કપ જીત્યો અને ટેસ્ટ સદી સાથે આંતરરાષ્ટ્રીય ક્રિકેટમાં પદાર્પણ કર્યું. જોકે, આવા ધમાકેદાર પ્રદર્શન છતાં, તે નેશનલ ટીમમાં પોતાનું સ્થાન પાક્કુ કરી શક્યો નહીં. 2018માં ટેસ્ટ ડેબ્યૂ કરવા છતાં તેણે છેલ્લા બે વર્ષમાં એકપણ આંતરરાષ્ટ્રીય મેચ રમી નથી. તેના માટે આઈપીએલ-2023 પણ નિરાશાજનક રહી હતી અને તેનું પ્રદર્શન ઘણું જ નબળું રહ્યું હતું. આઈપીએલ-2023માં તે આઠ મેચોમાં 13.25ની સરેરાશથી માત્ર 106 રન જ નોંધાવી શક્યો હતો.
પૃથ્વી શોએ એક ક્રિકબઝને જણાવ્યું હતું કે, જ્યારે મને (ભારતીય ટીમમાંથી) બહાર કરવામાં આવ્યો ત્યારે મને તેનું કારણ ખબર ન હતી. કોઈ કહેતું હતું કે તે ફિટનેસ હોઈ શકે છે. હું બેંગલુરુ આવ્યો હતો અને NCAમાં તમામ ટેસ્ટ ક્લિયર કરી હતી. રન નોંધાવ્યા અને ફરી ટી20 ટીમમાં પરત ફર્યો. પરંતુ વેસ્ટ ઈન્ડિઝમાં ફરી તક મળી નથી. હું નિરાશ છું પણ બસ આગળ વધવું છે. તેણે કહ્યું કે તે પોતાની જાત સુધી સીમિત રહેવા માંગે છે.
તેણે ભારપૂર્વક જણાવ્યું હતું કે તે પોતાના મંતવ્યો શેર કરવામાં ડરે છે કારણ કે તે બધું સોશિયલ મીડિયા પર આવે છે. પૃથ્વી શોએ કહ્યું હતું કે, એક વ્યક્તિ તરીકે, મને ફક્ત એકલા રહેવું ગમે છે. લોકો મારા વિશે ઘણી વાતો કહે છે. પણ જે મને ઓળખે છે, તેઓ જાણે છે કે હું કેવો છું. મારે મિત્રો નથી, મને મિત્રો બનાવવાનું પસંદ નથી. મને મારા વિચારો શેર કરવામાં પણ ડર લાગે છે. એક યા બીજી રીતે તે બધું સોશિયલ મીડિયા પર આવી જાય છે. મારા બહુ ઓછા મિત્રો છે, થોડા મિત્રો છે, અને તેમની સાથે પણ હું બધું જ શેર કરતો નથી માત્ર અમુક વાતો જ શેર કરું છું.
તેણે આગળ કહ્યું હતું કે, જો હું બહાર જઈશ તો લોકો પરેશાન કરશે. તેઓ સોશિયલ મીડિયા પર કંઈક મૂકશે, તેથી હું હાલના દિવસોમાં બહાર નીકળવાનું પસંદ કરતો નથી. હું જ્યાં જાઉં છું ત્યાં મુશ્કેલીઓ ઊભી થાય છે. મેં બહાર જવાનું સાવ બંધ કરી દીધું છે. આ દિવસોમાં હું લંચ અને ડિનર માટે પણ એકલો બહાર જઉં છું. હવે મને એકલા રહેવું ગમે છે. પૃથ્વી શો ઈંગ્લેન્ડમાં બાકીની કાઉન્ટી ક્રિકેટ સિઝન માટે નોર્થમ્પટનશાયર માટે રમવા માટે તૈયાર છે અને ઓગસ્ટમાં શરૂ થતા રોયલ લંડન વન-ડે કપનો પણ ભાગ બનશે.