ટ્રેવિસ હેડ બાદ સ્ટિવ સ્મિથની રેકોર્ડબ્રેક સદી
ઓસ્ટ્રેલિયાએ ગુરૂવારે બીજા દિવસે ત્રણ વિકેટે 327 રનના સ્કોરથી પોતાનો પ્રથમ દાવ આગળ ધપાવ્યો હતો. પ્રથમ દિવસના અંતે ટ્રેવિસ હેડ 146 અને સ્મિથ 95 રને રમતમાં હતા. બીજા દિવસની શરૂઆતમાં હેડે પોતાના 150 રન અને સ્મિથે પોતાની સદી પૂરી કરી હતી. ટ્રેવિસ હેડ 174 બોલમાં 25 ચોગ્ગા અને એક સિક્સરની મદદથી 163 રન નોંધાવીને આઉટ થયો હતો. તેણે સ્ટિવ સ્મિથ સાથે મળીને 285 રનની જંગી ભાગીદારી નોંધાવી હતી.
જ્યારે સ્મિથે ભારત સામે નવમી સદી ફટકારી હતી. હવે ભારત અને ઓસ્ટ્રેલિયા વચ્ચે ટેસ્ટમાં સૌથી વધુ સદી ફટકારવાના મામલે સ્મિથ બીજા ક્રમે આવી ગયો છે. તે હવે આ યાદીમાં ટોચ પર રહેલા સચિન તેંડુલકરના 11 સદીના રેકોર્ડની બરાબરીથી બે સદી જ પાછળ છે. સ્ટિવ સ્મિથે 268 બોલમાં 19 ચોગ્ગાની મદદથી 121 રન ફટકાર્યા હતા. અંતે શાર્દૂલ ઠાકુરે તેને બોલ્ડ કરીને ભારતને મોટી સફળતા અપાવી હતી. હેડ અને સ્મિથ આઉટ થયા બાદ ઓસ્ટ્રેલિયન બેટિંગનો ધબડકો થયો હતો. વિકેટકીપર એલેક્સ કેરીએ 48 રનનું યોગદાન આપ્યું હતું. ભારત માટે મોહમ્મદ સિરાજે સૌથી વધુ ચાર વિકેટ ઝડપી હતી જ્યારે મોહમ્મદ શમી અને શાર્દૂલ ઠાકુરને બે-બે તથા રવિન્દ્ર જાડેજાને એક સફળતા મળી હતી.