વિરાટ કોહલીએ આપી સ્પેશિયલ ગિફ્ટ
બાંગ્લાદેશના 25 વર્ષના ઓલ-રાઉન્ડર મેંહદી હસન મિરાજ માટે આ સીરિઝ ઘણી શાનદાર રહી. ભારતનો બાંગ્લાદેશ પ્રવાસ સમાપ્ત થયા બાદ મેંહદીને ભારતીય ટીમના ભૂતપૂર્વ સુકાની વિરાટ કોહલીએ સ્પેશિયલ ગિફ્ટ આપી છે. કોહલીએ મેંહદી હસન મિરાજને પોતાની જર્સી ગિફ્ટ આપી હતી. કોહલીએ જર્સી પર પોતાનો ઓટોગ્રાફ આપવાની સાથે તેને શુભેચ્છાઓ પણ આપી હતી. મેંહદી હસન મિરાજે તેની તસ્વીર સોશિયલ મીડિયા પર શેર કરી છે.
ભારતીય ટીમને મુશ્કેલીમાં મૂકી હતી
મેંહદી હસન મિરાજ માટે ભારતનો બાંગ્લાદેશ પ્રવાસ યાદગાર રહ્યો. તેણે વન-ડે સીરિઝની પ્રથમ મેચમાં જ નવ વિકેટ પડી ગયા બાદ પોતાની ટીમને વિજય અપાવ્યો હતો. સીરિઝની બીજી મેચમાં તેણે સદી ફટકારી હતી. આ ઉપરાંત બોલિંગમાં પણ તેણે ચાર વિકેટ ઝડપી હતી. બાંગ્લાદેશે ત્રણ વન-ડે મેચની સીરિઝ 2-1થી જીતી લીધી હતી. મેંહદીને પ્રથમ મેચમાં મેન ઓફ ધ મેચ જાહેર કરવામાં આવ્યો હતો જ્યારે બાદમાં પ્લેયર ઓફ ધ સીરિઝ જાહેર કરાયો હતો.
ટેસ્ટમાં પણ તે સૌથી વધુ વિકેટ ઝડપનારો બોલર રહ્યો છે. તેણે બે ટેસ્ટ મેચની સીરિઝમાં કુલ 11 વિકેટ ઝડપી હતી. મીરપુર ટેસ્ટના બીજા દાવમાં તેણે કોહલી ઉપરાંત શુભમન ગિલ, ચેતેશ્વર પૂજારા, અક્ષર પટેલ અને રિશભ પંતને આઉટ કર્યા હતા. એક સમયે તે પોતાની ટીમને ભારત વિરુદ્ધ પ્રથમ ટેસ્ટ વિજય તરફ લઈ જતો જોવા મળ્યો હતો. જોકે, અશ્વિન અને શ્રેયસ ઐય્યરે તેના પ્રયાસો નિષ્ફળ બનાવ્યા હતા.