બાંગ્લાદેશે શેર-એ-બાંગ્લા નેશનલ સ્ટેડિયમ મીરપુરમાં રમાયેલી સીરિઝની ફર્સ્ટ ODI મેચમાં ભારતને 1 વિકેટથી હરાવ્યું. ભારતે પહેલા બેટિંગ કરતા 41.2 ઓરમાં 10 વિકેટ ગુમાવીને 186નો એકદમ સરળ ટાર્ગેટ આપ્યો હતો. જો કે, જવાબમાં બાંગ્લાદેશે એક રીતે મેચ હારતી દેખાઈ રહી હતી. પરંતુ 9મી વિકેટ માટે 50 રનથી વધુ પાર્ટનરશિપ સાથે બાંગ્લા ટીમે 46 ઓરમાં 9 વિકેટના નુકસાન પર 187 રન ફટકારીને શાનદાર વિજય મેળવ્યો છે. મહત્વનું છે બાંગ્લાદેશની એક પછી એક વિકેટ પડી રહી હોવાથી દર્શકો અને ટીમ ઈન્ડિયાને પણ એવું લાગતું હતું કે તેઓ જીતી જશે પરંતુ બોલર્સે સારી બેટિંગ કરીને પોતાની ટીમને ઐતિહાસિક પાર્ટનરશિપ સાથે જીત અપાવી છે. બીજી તરફ વર્લ્ડ કપમાં મળેલી કારમી હાર બાદથી રોષે ભરાયેલા ભારતીય ફેન્સની નારાજગી ઓર વધી ગઈ છે.
ભારત તરફથી મળેલા 187 રનના ટાર્ગેટનો પીછો કરવા ઉતરેલી યજમાન ટીમના બેટ્સમેનો સારો દેખાવ કરી શક્યા ન હતા, પરંતુ છેલ્લી વિકેટની ભાગીદારીએ આખી મેચની સ્થિતિ બદલી નાખી હતી. દીપક ચહરે ઘરઆંગણે નાનકડો ટાર્ગેટ હાંસલ કરવા માટે પ્રથમ બોલ પર જ ટીમને ચોંકાવી દીધી હતી. નજમુલ હુસૈન શૂન્ય પર પાછો ફર્યો. ઇનામુલ હકને વોશિંગ્ટન સુંદરે પરત મોકલ્યો હતો, જ્યારે કેએલ રાહુલના શાનદાર કેચ દ્વારા કેપ્ટન લિટન દાસને વિકેટની પાછળનો રસ્તો બતાવ્યો હતો. 3 વિકેટ પડ્યા બાદ ટીમ દબાણમાં આવી ગઈ હતી.
મિરાજે પલટી નાખી મેચ
136 રનના સ્કોર પર 9મી વિકેટ ગુમાવ્યા બાદ બાંગ્લાદેશની ટીમે જ્યારે આશા લગભગ છોડી દીધી હતી ત્યારે મેહિદી હસન મિરાજે એવી ઈનિંગ રમી કે મેચ રસપ્રદ બની ગઈ. આ બેટ્સમેને મુસ્તાફિઝુર રહેમાન સાથે મળીને મેચનો માર્ગ બદલી નાખ્યો હતો. એક છેડે, તેણે પહેલા શોટ લગાવીને મેચને નજીક લાવ્યો અને પછી મેચ બાંગ્લાદેશની કોથળીમાં નાખી.
