T20 World Cup 2022, IND vs SA T20 WC: બેકાર ગઈ સૂર્યાની તોફાની ફિફ્ટી, SA સામે ભારતની હાર – t20 world cup 2022 south africa beat india by 5 wickets

પર્થઃ ડેવિડ મિલર અને એડન માર્કરામ (52)ની તોફાની બેટિંગના આધારે દક્ષિણ આફ્રિકાએ T20 વર્લ્ડ કપ 2022ની મહત્વપૂર્ણ મેચમાં ભારતીય ટીમને 5 વિકેટથી હરાવ્યું. ભારતીય ટીમે ખરાબ શરૂઆત બાદ સૂર્યકુમાર યાદવની અડધી સદીના આધારે 133 રન બનાવ્યા હતા. જવાબમાં દક્ષિણ આફ્રિકાની ટીમની શરૂઆત પણ ખરાબ રહી હતી. આ પછી, એઇડન માર્કરામ અને ડેવિડ મિલરે મોરચો સંભાળ્યો અને ટીમને જીત અપાવવામાં મહત્વની ભૂમિકા ભજવી. માર્કરામે 41 બોલમાં 6 ચોગ્ગા અને એક છગ્ગાની મદદથી 52 રન બનાવ્યા હતા. બીજી તરફ આ જીત સાથે સાઉથ આફ્રિકા ટેબલ ટોપર બની ગયું છે જ્યારે પાકિસ્તાનની સેમીફાઈનલમાં પહોંચવાની આશા લગભગ સમાપ્ત થઈ ગઈ છે.

પાકિસ્તાનની તક રહે તે માટે ભારતનો વિજય કોઈપણ સંજોગોમાં જરૂરી હતો, પરંતુ રોમાંચક મેચમાં ભારતીય ટીમનો પરાજય થયો હતો. ડેવિડ મિલર અને માર્કરામ સિવાય લુંગી એનગિડીએ સાઉથ આફ્રિકા તરફથી શાનદાર બોલિંગ કરતા 4 વિકેટ ઝડપી હતી જ્યારે વોર્ન પાર્નેલ 3 વિકેટ પોતાના નામે કરી હતી. આ સિવાય ભારતીય ટીમે ફિલ્ડિંગમાં ખૂબ જ ખરાબ પ્રદર્શન કર્યું, જે તેની હારનું સૌથી મોટું કારણ બન્યું. વિરાટ કોહલીએ એક કેચ છોડ્યો, જ્યારે રન આઉટની તક ગુમાવી. બીજી તરફ રોહિત શર્મા પણ ચૂકી ગયો.

ભારતીય ઇનિંગ્સનો રોમાંચ
સૂર્યકુમાર યાદવની આકર્ષક અડધી સદી છતાં દક્ષિણ આફ્રિકા સામે 9 વિકેટે 133 રન જ બનાવી શક્યું હતું. ભારતે 49 રનમાં પાંચ વિકેટ ગુમાવ્યા બાદ, સૂર્યકુમારે 40 બોલમાં 68 રન બનાવ્યા જેમાં ત્રણ છગ્ગા અને છ ચોગ્ગા સામેલ હતા. દક્ષિણ આફ્રિકા માટે એનગિડીએ 29 રનમાં ચાર અને વેઇન પાર્નેલએ 15 રનમાં ત્રણ વિકેટ ઝડપી હતી. સૂર્યકુમાર સિવાય, અન્ય કોઈ ભારતીય બેટ્સમેન ઓપ્ટસ સ્ટેડિયમની ઝડપી અને ઉછાળવાળી પીચને અનુકૂલિત કરી શક્યો ન હતો અને રોહિત શર્માનો ટોસ જીત્યા બાદ બેટિંગ કરવાનો નિર્ણય ખોટો સાબિત થયો હતો.

કેએલ રાહુલે ફરી નિરાશ કર્યા
પાવરપ્લેમાં જ ભારતે પોતાના બંને ઓપનરોની વિકેટ ગુમાવી દીધી હતી. વેઈન પરનેલની પ્રથમ ઓવર મેડન હતી, ત્યારબાદ રોહિત (15)એ કાગિસો રબાડાની આગલી ઓવરમાં સિક્સર ફટકારીને ટીમનું ખાતું ખોલાવ્યું હતું. કેએલ રાહુલ (9 રન)એ પણ પાર્નેલની આગલી ઓવરમાં છગ્ગો ફટકારીને પોતાનો આત્મવિશ્વાસ વધારવાનો પ્રયાસ કર્યો હતો. રબાડાની આ ઓવરમાં રોહિતને પણ લાઈફલાઈન મળી હતી પરંતુ તે તેનો ફાયદો ઉઠાવી શક્યો ન હતો અને જ્યારે એનગિડી પાંચમી ઓવર નાખવા આવ્યો ત્યારે ભારતીય કેપ્ટને બોલરને કેચ આપી દીધો.

કેએલ રાહુલ બાદ રોહિત-વિરાટ પણ પરત ફર્યા
રાહુલનું ખરાબ ફોર્મ ચાલુ રહ્યું છે. એનગિડી એ જ ઓવરમાં તેને સ્લિપમાં કેચ કરાવીને ભારતને બીજો ઝટકો આપ્યો હતો. પાવરપ્લેમાં ભારતે બે વિકેટે 33 રન બનાવ્યા હતા. એનગિડીએ તેની બીજી ઓવરમાં વિરાટ કોહલી (12)ના રૂપમાં ભારતને ત્રીજો મોટો ફટકો આપ્યો હતો. છેલ્લી બે મેચમાં અડધી સદી ફટકારનાર કોહલીએ આ ઓવરના પહેલા બે બોલમાં ચોગ્ગા ફટકાર્યા હતા પરંતુ ટૂંક સમયમાં જ તેણે રબાડાને ફાઈન લેગ પર કેચ આપી દીધો હતો. દીપક હુડ્ડા પાંચમા નંબર પર આવ્યો પરંતુ એનરિક નોર્કિયાએ તેને ખાતું ખોલવા દીધું ન હતું. જ્યારરે હાર્દિક પંડ્યા માત્ર બે રન બનાવી શક્યો હતો.

સૂર્યકુમાર યાદવની વધુ એક તોફાની ઇનિંગ
રબાડાએ એનગિડીના બોલ પર તેનો શાનદાર કેચ લીધો હતો. હવે ધ્યાન સૂર્યકુમાર પર હતું જેણે નોર્કિયાને સિક્સર ફટકારીને દબાણ દૂર કરવાનો પ્રયાસ કર્યો હતો. સૂર્યકુમારે 30 બોલમાં એનગિડીના બોલ પર એક સિક્સર અને પછી ફોર ફટકારીને પોતાની અડધી સદી પૂરી કરી હતી. દસ ઓવર પછી, ભારતનો સ્કોર પાંચ વિકેટે 60 રન હતો, અને સૂર્યકુમારની બેટિંગને કારણે 15 ઓવરમાં સ્કોર 100 રનને પાર થયો હતો, પરંતુ દિનેશ કાર્તિક શરૂઆતથી જ રન બનાવવા માટે સંઘર્ષ કરી રહ્યો હતો (15 બોલમાં 6 રન) અને જલ્દી જ તેની વિકેટ ગુમાવી દીધી હતી. પછી સૂર્યકુમાર એક છેડેથી રન બનાવતો રહ્યો પરંતુ બીજા છેડેથી તેને કોઈ મદદ મળી નહીં. રવિચંદ્રન અશ્વિન પણ માત્ર સાત રન બનાવી શક્યો હતો.