આ દરમિયાન 12 મેમ્બર દેશ 777 આંતરરાષ્ટ્રીય મેચ રમશે, જેમાં 173 ટેસ્ટ, 281 વન-ડે અને 323 ટી20 મેચ સામેલ છે. વર્તમાન સત્રમાં ટીમોએ 694 મેચ રમી છે. આ સાયકલમાં આઈસીસીની બે મેન્સ ટેસ્ટ ચેમ્પિયનશિપ, આઈસીસી ટુર્નામેન્ટ અને દ્વિપક્ષીય અને ત્રણ દેશોની શ્રેણી સામેલ છે. ભારત અને ઓસ્ટ્રેલિયા વચ્ચે બોર્ડર ગાવસ્કર ટ્રોફી ચાર મેચોના બદલે પાંચ મેચ થઈ ગઈ છે. ભારતીય ટીમ ઈંગ્લેન્ડ અને ઓસ્ટ્રેલિયા બંને વિરુદ્ધ પાંચ મેચની શ્રેણી રમશે. ભારતને જુલાઈ-ઓગસ્ટ 2023માં વેસ્ટ ઈન્ડિઝના પ્રવાસે બે ટેસ્ટ, ત્રણ વન-ડે અને ત્રણ ટી20 મેચ રમવાની છે.
ઈંગ્લેન્ડ વિરુદ્ધ પાંચ મેચની ઘરેલું શ્રેણી જાન્યુઆરીથી માર્ચ 2024 વચ્ચે રમાશે. ઓસ્ટ્રેલિયન ટીમ પૂર્વ સાયકલના કાર્યક્રમ અંતર્ગત આગામી વર્ષની શરૂઆતમાં ભારતમાં ચાર ટેસ્ટ રમશે. ભારતીય ટીમ 2024-25માં ઓસ્ટ્રેલિયામાં પાંચ ટેસ્ટ રમશે અને 1991 બાદ આ પ્રથમ વખત હશે. ભારત સપ્ટેમ્બર 2024માં બે ટેસ્ટ માટે બાંગ્લાદેશની યજમાની કરશે. ભારતીય ટીમ 2023માં વન-ડે વર્લ્ડ કપ અગાઉ 27 વન-ડે મેચ રમશે.
બાંગ્લાદેશ સૌથી વધુ 150 દ્વિપક્ષીય ઈન્ટરનેશનલ મેચ રમશે
પ્રત્યેક ટીમ પર નજર કરવામાં આવે તો બાંગ્લાદેશ સૌથી વધુ 150 દ્વિપક્ષીય ઈન્ટરનેશનલ મેચ રમશે. ત્યારબાદ વેસ્ટ ઈન્ડિઝ છે જે 147 મેચ રમશે. ઈંગ્લેન્ડ 142, ભારત 141, ન્યૂઝીલેન્ડ 135, ઓસ્ટ્રેલિયા 132, શ્રીલંકા 131, પાકિસ્તાન 130, અફઘાનિસ્તાન 123, સાઉથ આફ્રિકા 113, આયર્લેન્ડ 110 અને ઝિમ્બાબ્વે 109 મેચ રમશે. આમ 12 ટીમો મળીને કુલ 777 મેચ રમશે. જેમાંથી ઈંગ્લેન્ડ સૌથી વધુ 43 ટેસ્ટ મેચ રમશે. જ્યારે ઓસ્ટ્રેલિયા 40 અને ભારત 38 ટેસ્ટ મેચ રમશે.