Roger Federer Retires: 41 વર્ષીય રોજર ફેડરરની ગણના વિશ્વના લિજેન્ડરી ટેનિસ ખેલાડીઓમાં થાય છે. તેણે 20 ગ્રાન્ડ સ્લેમ ટાઈટલ જીત્યા છે. રોજર ફેડરર ગત વર્ષે વિમ્બલડન ટુર્નામેન્ટ બાદ એક પણ મેચ રમ્યો નથી. ફેડરરે ટ્વિટર પર જાહેરાત કરતા કહ્યું હતું કે, તમે લોકો જાણો છો કે, છેલ્લા ત્રણ વર્ષથી હું ઈજા અને સર્જરીનો સામનો કર્યો છું.
હાઈલાઈટ્સ:
- રોજર ફેડરર છેલ્લા ઘણા સમયથી ઈજાના કારણે પરેશાન રહ્યો છે, જેની અસર તેની રમત પર પણ પડી હતી
- ફેડરરે 20 ગ્રાન્ડ સ્લેમ ટાઈટલ જીત્યા છે, જેમાં રેકોર્ડ આઠ વિમ્બલડન ટાઈટલ સામેલ છે
- ફેડરરે 103 એટીપી સિંગલ્સ ટાઈટલ જીત્યા છે અને આ મામલે તે જિમ્મી કોનર્સ બાદ બીજા ક્રમે છે
મેં કમબેક માટે આકરી મહેનત કરી છે, પરંતુ હું મારા શરીરની ક્ષમતા અને મર્યાદાઓ જાણું છું. તેણે હવે સ્પષ્ટ સંદેશ આપી દીધો છે. હું 41 વર્ષનો છું. છેલ્લા 24 વર્ષમાં હું 1,500થી વધુ મેચ રમી ચૂક્યો છું. મેં જેનું સપનું જોયું હતું તેના કરતા પણ ટેનિસે મને ઘણું બધું આપ્યું છે. હવે મારે સ્વીકારી લેવું જોઈએ કે મારી સ્પર્ધાત્મક કારકિર્દીનો અંત આવી ગયો છે. આગામી સપ્તાહે લંડનમાં રમાનારી લેવર કપ મારી અંતિમ એટીપી ઈવેન્ટ હશે. ભવિષ્યમાં હું ઘણું બધું ટેનિસ રમીશ પરંતુ ગ્રાન્ડ સ્લેમ કે ટૂરમાં નહીં.
ઈજાના કારણે રહ્યો છે પરેશાન, રમત પર પણ પડી અસર
તાજેતરના વર્ષોમાં રોજર ફેડરર ઈજાના કારણે ઘણો પરેશાન રહ્યો હતો જેના કારણે તેની રમત પર પણ અસર પડી હતી. છેલ્લા બે વર્ષમાં તેને ત્રણ વખત ઘૂંટણની સર્જરી કરાવવી પડી છે. તેણે છેલ્લે 2021માં વિમ્બલડનમાં પોતાની અંતિમ કોમ્પિટિટિવ મેચ રમી હતી. જેમાં તે ક્વાર્ટર ફાઈનલમાં પોલેન્ડના હબર્ટ હુરકાઝ સામે હારી ગયો હતો.
2003માં વિમ્બલડન જીત્યા બાદ ટેનિસ જગત પર કર્યું છે રાજ
રોજર ફેડરરે 2003માં વિમ્બલડનમાં પોતાનું પ્રથમ ગ્રાન્ડ સ્લેમ ટાઈટલ જીત્યું હતું. ત્યારબાદ તેણે પાછું વળીને જોયું નથી. પ્રથમ ગ્રાન્ડ સ્લેમ જીત્યા બાદ ફેડરરે મેન્સ ટેનિસમાં વર્ષો સુધી દબદબો ભોગવ્યો છે. રોજર ફેડરરે 20 ગ્રાન્ડ સ્લેમ ટાઈટલ જીત્યા છે. જેમાં રેકોર્ડ આઠ વિમ્બલડ ટાઈટલ સામેલ છે. તેણે 103 એટીપી સિંગલ્સ ટાઈટલ જીત્યા છે અને સૌથી વધુ એટીપી સિંગલ્સ ટાઈટલ જીતવાના મામલે તે જિમ્મી કોનર્સ બાદ તે બીજા સ્થાને છે. તે 310 સપ્તાહ સુધી વિશ્વનો નંબર વન ટેનિસ ખેલાડી રહ્યો હતો જેમાં રેકોર્ડ સળંગ 237 સપ્તાહ સામેલ છે. પાંચ વખત તેણે વિશ્વના નંબર વન ખેલાડી તરીકે વર્ષનો અંત કર્યો હતો.
Gujarati News – I am Gujarat: ગુજરાત, દેશ, વિદેશ, શિક્ષણ, બિઝનેસ, મૂવી, જ્યોતિષ, ધર્મ, સ્પોર્ટ્સના લેટેસ્ટ સમાચાર ઉપરાંત વાયરલ ન્યૂઝ મેળવવા માટે ડાઉનલોડ કરો I am Gujaratની એપ