પાકિસ્તાને ભારત સામેની મેચ ગુમાવ્યા પછી હોંગકોંગ સામે જબરજસ્ત કમબેક કરીને T20 મેચ એક ટીમનો સ્કોર હોય તેટલા 155 રનના માર્જિન સાથે જીતી લીધી હતી. ભારત સામે હાર મળ્યા પછી ટીમે મોટા માર્જિન સાથે મેચ જીતીને કમબેક કર્યું છે, હવે આ ટીમ ફરી એકવાર ભારતીય ટીમને હરાવવાના પ્રયાસ સાથે મેદાનમાં ઉતરશે. પરંતુ આંકડાની દ્રષ્ટીએ જોઈએ તો ભારતીય ટીમ પાસે પાકિસ્તાન કરતા વધુ અનુભવ છે અને ટીમ ફૂલ ફોર્મમાં છે.
આ બધાની વચ્ચે 2019માં પાકિસ્તાનની ભારત સામે થયેલી હાર બાદ ‘મારો મુજે મારો’ કહેનારો પાકિસ્તાની ફેન દુબઈના ઈન્ટરનેશનલ સ્ટેડિયમમાં ઈરફાન પઠાણને મળ્યો હતો. આ દરમિયાન મોમિન સાકીબે પોતાના ઈન્સ્ટાગ્રામ અકાઉન્ટ પર વિડીયો શેર કર્યો છે જેમાં તે ઈરફાન પઠાણ સાથે વાત કરતો દેખાય છે. મોમિને આ વિડીયો શેર કરીને કેપ્શનમાં લખ્યું છે કે, “ઈરફાન પઠાણને મળીને ખુશી થઈ, જે ભારતના સૌથી સારા સ્વીંગ બોલર રહ્યા છે. પરંતુ ઈરફાન ભાઈ તમે માનો કે ના માનો, એશિયા કપ અમારો છે! @irfanpathan_official”
આ વિડીયોમાં મોમિન ઈરફાન પઠાણને કહે છે કે, “2006માં તમે પાકિસ્તાન સામે Epic કર્યું હતું, ભાઈ કેમ છો તમે? મારું તો બધું કામ બરાબર છે.” ઈરફાન પઠાણના હાલચાલ પૂછ્યા પછી મોમિને રવિવારની મેચ વિશેનો સવાલ પૂછી લીધો હતો, તેણે કહ્યું- સન્ડે વિશે તમને શું લાગી રહ્યું છે? જે પાકિસ્તાન-ભારતની સન્ડે મેચ થવાની છે.
આ સવાલનો ઈરફાન પઠાણે મસ્ત જવાબ આપીને કહ્યું- ‘રિપીટ જ થશે..’ આ સાંભળીને મોમિને સામે મજાક કરતા કહ્યું, “પાછલા વર્ષ વાળું?” જેનો મતલબ એવો થતો હતો કે વર્ષ 2021માં યોજાયેલા T20 વર્લ્ડકપ દરમિયાન દુબઈમાં પાકિસ્તાને ભારતને હરાવ્યું હતું. આ સાંભળ્યા પછી બન્ને જણા હસી પડ્યા હતા અને ઈરફાને કહ્યું કે- “એ એકવાર થઈ ગયું યાર, વારંવાર નહીં થાય. હવે છોકરાઓનું ફોર્મ આવી ગયું છે.” આ પછી મોમિને પોતાની વાત વાળી લેતા એવું કહ્યું કે- “હું તો ઈચ્છું છું કે બન્ને ટીમો ફાઈનલમાં રમતી જોવા મળે”
ભારત અને પાકિસ્તાન વચ્ચે પાછલા રવિવારે T20 મેચ યોજાઈ હતી, જેમાં ભારતે જીત મેળવી હતી, આ મેચમાં ઓપનર આઉટ થયા પછી રવિન્દ્ર જાડેજા અને હાર્દિક પંડ્યાએ બાજી સંભાળી હતી અને અંતિમ ઓવરમાં બોલ કરતા વધુ રનની જરુર હતી ત્યારે પણ હાર્દિક પંડ્યાએ ધોનીની જેમ કૂલ અંદાજમાં રહીને પાકિસ્તાનને નિશ્ચિત ઓવર પૂર્ણ થાય તે પહેલા જ શાનદાર છગ્ગો મારીને હરાવી દીધું હતું.