પાકિસ્તાન ક્રિકેટ બોર્ડે પોતાના સત્તાવાર ટ્વિટર હેન્ડલ પર એક વિડીયો અપલોડ કર્યો છે જે ઘણો જ વાયરલ થયો છે. આ વિડીયોમાં શાહીન આફ્રિદી અને વિરાટ કોહલી એકબીજાને મળતા જોવા મળે છે. જેમાં શાહીન આફ્રિદી કોહલીને કહી રહ્યો છે કે, ‘તમારા માટે દુવા કરી રહ્યા છીએ કે તમે ઝડપથી ફોર્મમાં પાછા આવી જાવ.’ જ્યારે કોહલી પણ તેને કહે છે કે, ‘ધ્યાન રાખજો. ઝડપથી સાજા થઈ જાવ.’
જોકે, ફક્ત કોહલી જ નહીં પરંતુ ભારતીય ટીમના અન્ય ખેલાડીઓ પણ શાહીન આફ્રિદીના ખબર અંતર પૂછતા જોવા મળે છે અને તેને ઝડપથી સાજા થવાની શુભેચ્છાઓ પાઠવતા જોવા મળે છે. યુઝવેન્દ્ર ચહલ, રિશભ પંત અને લોકેશ રાહુલ પણ તેના ખબર અંતર પૂછે છે. જ્યારે બંને ટીમના સપોર્ટ સ્ટાફ પણ એકબીજા સાથે હળતા-મળતા અને વાતો કરતા જોવા મળી રહ્યા છે.
ઈજાના કારણે એશિયા કપમાં નથી રમવાનો શાહીન આફ્રિદી
પાકિસ્તાન ક્રિકેટ બોર્ડે ગત શનિવારે જાહેર કર્યું હતું કે, ઘૂંટણની ઈજાના કારણે શાહીન આફ્રિદી એશિયા કપમાં રમી શકશે નહીં. આ ઉપરાંત તે ઈંગ્લેન્ડ વિરુદ્ધ ઘરઆંગણે રમાનારી સીરિઝમાં પણ રમી શકશે નહીં જે 20 સપ્ટેમ્બરથી શરૂ થશે. જોકે, તે ઓક્ટોબરમાં ન્યૂઝીલેન્ડ ટ્રાઈ-સીરિઝ પહેલા ફિટ થઈ જશે અને ત્યારબાદ ઓસ્ટ્રેલિયામાં રમાનારા ટી20 વર્લ્ડ કપમાં પણ જોવા મળશે. ગોલ ખાતે શ્રીલંકા વિરુદ્ધ રમાયેલી પ્રથમ ટેસ્ટમાં ફિલ્ડિંગ દરમિયાન તેના જમણા પગના ઘૂંટણમાં લિગામેન્ટની ઈજા થઈ હતી.
આઉટ ઓફ ફોર્મ કોહલી પાસેથી ધમાકેદાર પ્રદર્શનની આશા
બીજી તરફ વિરાટ કોહલી માટે આ ટુર્નામેન્ટ ઘણી જ મહત્વની છે. ટી20 વર્લ્ડ કપને ધ્યાનમાં રાખતા આ ટુર્નામેન્ટ ટી20 ફોર્મેટમાં રમાશે. તેથી ખેલાડીઓ પણ ટી20 વર્લ્ડ કપ માટેની ટીમમાં સ્થાન મેળવવા ધમાકેદાર પ્રદર્શન કરવા આતુર રહેશે. કોહલી છેલ્લા ઘણા સમયથી ફોર્મમાં નથી અને તેણે ઓક્ટોબર 2019માં પોતાની અંતિમ આંતરરાષ્ટ્રીય સદી ફટકારી હતી. ક્રિકેટપ્રેમીઓ આશા રાખી રહ્યા છે કે તે ઝડપથી ફોર્મમાં આવી જાય અને ટીમને વિજયી બનાવવામાં યોગદાન આપે.