શૂટર્સની ગેરહાજરી છતાં ભારતનું શાનદાર પ્રદર્શન
બેડમિન્ટનમાં પીવી સિંધૂ, લક્ષ્ય સેન તથા ચિરાગ શેટ્ટી અને સાત્વિકસાઈરાજ રાન્કીરેડ્ડીની જોડીએ અપેક્ષા પ્રમાણે પ્રદર્શન કર્યું હતું. જ્યારે 40 વર્ષીય શરત કમલે તેના જેવા જ દિગ્ગજ ખેલાડી લિયામ પિચફોર્ડ સામે લાજવાબ પ્રદર્શન કરીને ગોલ્ડ મેડલ જીત્યો હતો. ભારતે કુલ 22 ગોલ્ડ મેડલ જીત્યા જે 2018ની તુલનામાં ચાર મેડલ ઓછા છે. જોકે, બર્મિંઘમમાં શૂટિંગની ઈવેન્ટ રાખવામાં આવી ન હતી જેમાં ભારતનું પ્રદર્શન શ્રેષ્ઠ રહ્યું છે. ચાર વર્ષ અગાઉ ગોલ્ડ કોસ્ટમાં રમાયેલી કોમનવેલ્થ ગેમ્સમાં શૂટર્સે સાત ગોલ્ડ મેડલ જીત્યા હતા. તે ગેમ્સમાં ભારતે કુલ 66 ગોલ્ડ મેડલ જીત્યા હતા. જો શૂટર્સની ગેરહાજરીને ધ્યાનમાં લેવામાં આવે તો ભારતનું પ્રદર્શન ઘણું સારું રહ્યું છે.
હોકીમાં કર્યા નિરાશ, ફાઈનલમાં ઓસ્ટ્રેલિયા સામે 0-7થી પરાજય
જોકે, અંતિમ દિવસનું સમાપન ભારત માટે નિરાશાજનક રહ્યું હતું. એક તરફ બેડમિન્ટન અને ટેબલ ટેનિસમાં ભારતે ધમાકેદાર પ્રદર્શન કર્યું તો ભારતીય મેન્સ હોકી ટીમનું પ્રદર્શન ઘણું જ નિરાશાજનક રહ્યું હતું. ગોલ્ડ મેડલના મુકાબલામાં ભારતીય ટીમનો સામનો ઓસ્ટ્રેલિયા સામે હતો. જોકે, મેચમાં એક પણ સમયે ભારતીય ટીમ પડકાર રજૂ કરી શકી ન હતી. ભારતીય ટીમ એક ગોલ પણ નોંધાવવામાં નિષ્ફળ રહી. જેના કારણે ટીમને 0-7થી પરાજયનો સામનો કરવો પડ્યો અને સિલ્વર મેડલથી સંતોષ માનવો પડ્યો.
મેડલ ટેલીમાં ઓસ્ટ્રેલિયા ટોચ પર, યજમાન ઈંગ્લેન્ડ બીજા ક્રમે
કોમનવેલ્થ ગેમ્સ-2022માં ઓસ્ટ્રેલિયા ટોચ પર રહ્યું. ઓસ્ટ્રેલિયાએ 67 ગોલ્ડ, 57 સિલ્વર તથા 54 બ્રોન્ઝ સહિત કુલ 178 મેડલ જીત્યા. જ્યારે યજમાન ઈંગ્લેન્ડ 57 ગોલ્ડ, 66 સિલ્વર અને 53 બ્રોન્ઝ સહિત કુલ 176 મેડલ સાથે બીજા ક્રમે રહ્યું. ત્રીજા ક્રમે રહેલા કેનેડાએ કુલ 92 મેડલ જીત્યા જેમાં 26 ગોલ્ડ, 32 સિલ્વર અને 34 બ્રોન્ઝ મેડલનો સમાવેશ થાય છે. ભારત 22 ગોલ્ડ, 16 સિલ્વર અને 23 બ્રોન્ઝ સહિત કુલ 61 મેડલ સાથે ચોથા સ્થાને રહ્યું. ટોપ-5માં અંતિમ દેશ ન્યૂઝીલેન્ડનો રહ્યો જેણે 20 ગોલ્ડ, 12 સિલ્વર અને 17 બ્રોન્ઝ સહિત 40 મેડલ જીત્યા હતા.ે
CWG: બેડમિન્ટનમાં ભારતનો સપાટો, પીવી સિંધૂ અને લક્ષ્ય સેને જીત્યા ગોલ્ડ મેડલસાત્વિક અને ચિરાગ શેટ્ટીએ રચ્યો સુવર્ણ ઈતિહાસ
ભારતની સ્ટાર ડબલ્સ જોડી સાત્વિક સાઈરાજ અને ચિરાગ શેટ્ટીની જોડીએ મેન્સ ડબલ્સની ફાઈનલમાં લાજવાબ પ્રદર્શન કર્યું હતું. ભારતીય જોડીનો સામનો ઈંગ્લેન્ડની બેન લેન અને સીન વેન્ડીની જોડી સામે હતો. સાત્વિક અને ચિરાગની જોડીએ પ્રથમ ગેમથી જ દબદબો બનાવ્યો હતો. ભારતીય જોડીએ પ્રથમ ગેમ 21-15થી જીતી લીધી હતી. ત્યારબાદ બીજી ગેમમાં પણ ભારતીય જોડીએ ઈંગ્લેન્ડની જોડીને કોઈ તક આપી ન હતી. 21-13થી બીજી ગેમ જીતવાની સાથે જ સાત્વિક અને ચિરાગે ગોલ્ડ મેડલ જીતી લીધો હતો. કોમનવેલ્થ ગેમ્સમાં બેડમિન્ટનમાં મેન્સ ડબલ્સમાં ભારતનો પ્રથમ ગોલ્ડ મેડલ છે. કોમનવેલ્થ ગેમ્સ-2022માં ભારતનો આ ત્રીજો બેડમિન્ટન ગોલ્ડ મેડલ હતો.
પીવી સિંધૂ અને લક્ષ્ય સેને પ્રથમ કોમનવેલ્થ ગેમ્સ ગોલ્ડ મેડલ જીત્યા
ભારતની સ્ટાર શટલર પીવી સિંધૂએ અપેક્ષા પ્રમાણે પ્રદર્શન કરતાં ગોલ્ડ મેડલ જીત્યો હતો. પીવી સિંધૂનો આ પ્રથમ કોમનવેલ્થ ગેમ્સ ગોલ્ડ મેડલ છે. વિમેન્સ સિંગલ્સની ફાઈનલમાં તેણે કેનેડાની મિચેલ લિને 21-15, 21-13થી પરાજય આપ્યો હતો. આ સાથે સિંધૂ સાઈના નેહવાલ બાદ કોમનવેલ્થ ગેમ્સમાં ગોલ્ડ મેડલ જીતનારી ભારતની બીજી મહિલા બેડમિન્ટન ખેલાડી બની હતી. સિંધૂના ગોલ્ડ મેડલ બાદ ભારતના યુવાન સ્ટાર શટલર લક્ષ્ય સેને પણ દેશને વધુ એક ગોલ્ડ મેડલ અપાવ્યો હતો. મેન્સ સિંગલ્સમાં લક્ષ્યનો સામનો મલેશિયાના ઝે યંગ સામે હતો. લક્ષ્યએ પ્રથમ ગેમ ગુમાવી દીધી હતી પરંતુ બાદમાં વળતો પ્રહાર કરતાં તેણે 19-21, 21-9, 21-16થી વિજય નોંધાવીને કોમનવેલ્થ ગેમ્સમાં પોતાનો પ્રથમ ગોલ્ડ મેડલ જીત્યો હતો. લક્ષ્ય સેન પ્રકાશ પાદુકોણ, સૈયદ મોદી અને પારુપલ્લી કશ્યપ બાદ કોમનવેલ્થ ગેમ્સમાં ગોલ્ડ મેડલ જીતનારો ચોથો ભારતીય પુરૂષ બેડમિન્ટન ખેલાડી બન્યો છે.