પ્રથમ T20: અર્શદીપ-ચહરના ઝંઝાવાત બાદ રાહુલ-સૂર્યાનું આક્રમણ, દ.આફ્રિકા સામે ભારતનો વિજય – india vs south africa 1st t20 rahul suryakumar and arshdeep shine as team india beat proteas

અર્શદીપ સિંહ અને દીપક ચહરની ઝંઝાવાતી બોલિંગ બાદ સૂર્યકુમાર યાદવ અને લોકેશ રાહુલની લાજવાબ બેટિંગની મદદથી ભારતે બુધવારે તિરુવનંતપુરમ ખાતે રમાયેલી પ્રથમ ટી20 ક્રિકેટ મેચમાં સાઉથ આફ્રિકા સામે આઠ વિકેટે શાનદાર વિજય નોંધાવ્યો હતો. આ સાથે જ રોહિત શર્માની આગેવાનીવાળી ટીમે ત્રણ મેચની સીરિઝમાં 1-0ની સરસાઈ મેળવી લીધી છે. ભારતે ટોસ જીતીને સાઉથ આફ્રિકાને પ્રથમ બેટિંગનું આમંત્રણ આપ્યું હતું. અર્શદીપ અને ચહરની ઘાતક બોલિંગ સામે ટેમ્બા બાવુમાની ટીમ ઘૂંટણીયે પડી ગઈ હતી. એક સમયે સાઉથ આફ્રિકાએ 9 રનમાં પોતાની અડધી ટીમ ગુમાવી દીધી હતી. પરંતુ કેશવ મહારાજની મહત્વની ઈનિંગ્સની મદદથી પ્રવાસી ટીમે નિર્ધારીત 20 ઓવરમાં આઠ વિકેટે 106 રનનો સ્કોર નોંધાવ્યો હતો. જેના જવાબમાં ભારતે 16.4 ઓવરમાં બે વિકેટે 110 રન નોંધાવીને મેચ જીતી લીધી હતી. અર્શદીપે ત્રણ અને ચહરે બે વિકેટ ઝડપી હતી. જ્યારે લોકેશ રાહુલ અને સૂર્યકુમાર યાદવે અણનમ અડધી સદી ફટકારી હતી. હવે બંને ટીમ વચ્ચે બીજી ટી20 2 ઓક્ટોબરે ગુવાહાટીમાં રમાશે.

રાહુલ અને સૂર્યકુમારની જોડીએ અપાવ્યો વિજય, બંનેએ ફટકારી અણનમ અડધી સદી
107 રનના આસાન લક્ષ્યાંકને પાર પાડવા મેદાનમાં ઉતરેલી ભારતીય ટીમની શરૂઆત નિરાશાજનક રહી હતી. સુકાની ઓપનર રોહિત શર્મા ખાતું પણ ખોલાવી શક્યો ન હતો. જ્યારે વિરાટ કોહલી ત્રણ રન નોંધાવીને આઉટ થયો હતો. ટીમે 17 રનમાં બે મહત્વની વિકેટો ગુમાવી દીધી હતી. જોકે, બાદમાં લોકેશ રાહુલ અને સૂર્યકુમાર યાદવની જોડીએ શાનદાર બેટિંગ કરીને ટીમને વિજય અપાવ્યો હતો. આ બંનેએ લાજવાબ બેટિંગ કરતા અણનમ અડધી સદી ફટકારી હતી. આ બંનેએ 93 રનની અતૂટ ભાગીદારી નોંધાવી હતી. સૂર્યકુમાર યાદવે 33 બોલમાં પાંચ ચોગ્ગા અને ત્રણ સિક્સરની મદદથી અણનમ 50 અને લોકેશ રાહુલે 56 બોલમાં બે ચોગ્ગા અને ચાર સિક્સરની મદદથી અણનમ 51 રનની ઈનિંગ્સ રમી હતી. સાઉથ આફ્રિકા માટે કાગિસો રબાડા અને એનરિચ નોર્ટજેએ એક-એક વિકેટ ઝડપી હતી.

અર્શદીપ અને દીપક ચહરનો તરખાટ, સાઉથ આફ્રિકાના બેટર્સ લાચાર
ભારતે ટોસ જીતીને સાઉથ આફ્રિકાને પ્રથમ બેટિંગનું આમંત્રણ આપ્યું હતું. જોકે, અર્શદીપ સિંહ અને દીપક ચહરની ઝંઝાવાતી બોલિંગ સામે પ્રવાસી ટીમનો ટોપ ઓર્ડર ધ્વસ્ત થઈ ગયો હતો. જેના કારણે ટીમ 20 ઓવરમાં આઠ વિકેટે 106 રનનો સ્કોર જ નોંધાવી શકી હતી. સાઉથ આફ્રિકા માટે ક્વિન્ટન ડીકોક અને સુકાની ટેમ્બા બાવુમાની જોડી ઓપનિંગમાં આવી હતી. અર્શદીપ સિંહે પ્રથમ ઓવરના અંતિમ બોલ પર ડીકોકને આઉટ કર્યો હતો જે એક રન નોંધાવીને પેવેલિયન ભેગો થયો હતો. ત્યારબાદ તે પછીની ઓવરમાં દીપક ચહરે બાવુમાને અને તે પછીની ઓવરમાં અર્શદીપે રિલી રોશોને આઉટ કર્યો હતો. આ બંને જણા ખાતું ખોલાવી શક્યા ન હતા. સાઉથ આફ્રિકાએ આઠ રનમાં પોતાની ટોચની ત્રણ વિકેટ ગુમાવી દીધી હતી. જોકે, હજી ટીમ આ ઝટકાઓમાંથી બહાર આવે તે પહેલા બંને બોલર્સે ટીમને વધુ બે ઝટકા આપ્યા હતા.

અર્શદીપ સિંહે ડેવિડ મિલર અને ટ્રિસ્તાન સ્ટબ્સને ચહરે પેવેલિયન ભેગા કરી દીધા હતા. આ બંને બેટર ખાતુ ખોલાવવામાં નિષ્ફળ રહ્યા હતા. સાઉથ આફ્રિકાએ 9 રનના સ્કોર પર પોતાની અડધી ટીમ ગુમાવી દીધી હતી. જોકે, બાદમાં એઈડન માર્કરામ અને વેન પાર્નેલ તથા કેશવ મહારાજે ઉપયોગી ઈનિંગ્સ રમીને ટીમના સ્કોરને સન્માનજનક સ્થિતિમાં પહોંચાડ્યો હતો. કેશવ મહારાજે સૌથી વધુ 41 રન નોંધાવ્યા હતા. તેણે 35 બોલમાં પાંચ ચોગ્ગા અને બે સિક્સર ફટકારી હતી. જ્યારે માર્કરામે 25 અને પાર્નેલે 24 રન નોંધાવ્યા હતા. ભારત માટે અર્શદીપે ત્રણ, ચહર અને હર્ષલ પટેલે બે-બે તથા અક્ષર પટેલે એક વિકેટ ઝડપી હતી.