ભારતીય ક્રિકેટ કંટ્રોલ બોર્ડે એક વિડીયો પોસ્ટ કર્યો છે જેમાં કોહલી રૌફને પોતાની જર્સી આપે છે અને તેના પર ઓટોગ્રાફ પણ આપ્યા હતા. નોંધનીય છે કે મેચના આગળના દિવસે પણ ટ્રેનિંગ સેશન દરમિયાન બંને ટીમના ખેલાડીઓ એકબીજાને મળતા જોવા મળ્યા હતા. કોહલીએ મેચ પહેલા પાકિસ્તાની સુકાની બાબર આઝમ અને ઈજાગ્રસ્ત ઝડપી બોલર શાહીન આફ્રિદી સાથે વાતચીત કરી હતી. રોહિત શર્મા પણ બાબર આઝમને મળ્યો હતો.
વિરાટ કોહલીની 100મી આંતરરાષ્ટ્રીય ટી20 મેચ હતી
પાકિસ્તાન સામેનો મુકાબલો વિરાટ કોહલી માટે ઘણો ખાસ રહ્યો હતો. આ વિરાટ કોહલીની 100મી આંતરરાષ્ટ્રીય ટી20 મેચ હતી. આ મેચ પહેલા કોહલી અને રૌફ ફક્ત એક જ વખત આમને સામને થયા હતા. ત્યારે કોહલીએ અણનમ 8 રન નોંધાવ્યા હતા. એશિયા કપમાં ભારત સામે રૌફનું પ્રદર્શન અપેક્ષા પ્રમાણે રહ્યું ન હતું. તેણે ચાર ઓવરમાં 35 રન આપ્યા હતા અને એક પણ વિકેટ ઝડપી શક્યો ન હતો.
ભારત સામે પરાજય બાદ અખ્તરે પાકિસ્તાની ટીમની ઝાટકણી કાઢી
પાકિસ્તાનના પરાજય બાદ ભૂતપૂર્વ ઝડપી બોલર શોએબ અખ્તરે ટીમ પસંદગીને લઈને આકરી પ્રતિક્રિયા આપી હતી. અખ્તરે ટીમના એપ્રોચની આકરી ઝાટકણી કાઢી હતી અને કહ્યું હતું પાવરપ્લેમાં વધારે ડોટ બોલ રમવાથી ટીમને ફાયદો થવાનો નથી. તેણે ટીમની પસંદગી સામે પણ સવાલો ઉઠાવ્યા હતા અને કહ્યું હતું કે બાબર આઝમે ઓપનિંગના બદલે ત્રીજા ક્રમે આવવું જોઈએ. પોતાની યુટ્યુબ ચેનલ પર અખ્તરે કહ્યું હતું કે, જો રિઝવાન વધારે ઝડપથી નહીં રમે તો શું થશે? પ્રથમ છ ઓવરમાં 19 ડોટ બોલ હતા. જો તમે આટલા બધા ડોટ બોલ રમશો તો તમે ચોક્કસથી મુશ્કેલીમાં મૂકાશો.